बिर्तामोड, माघ २५ । झापाको बिर्तामोड-५ मा रहेको टावर टेम्पल स्कुलले संस्थापक स्वर्गीय नरेशमान धिमालको स्मृतिमा आयोजना गरेको झापा जिल्ला अन्तरविद्यालय बास्केटबल प्रतियोगिताको उपाधि टावर टेम्पल स्कुलले जितेको छ ।
माघ २० गतेबाट सुरु भई आज विद्यालयमा भएको फाइनल खेलमा टावर टेम्पलले वाल्मीकि एजुकेसन फाउन्डेसनलाई हराउँदै उपाधि जितेको हो ।
विजेता टावर टेम्पलले ७२ स्कोर प्राप्त गरेको थियो भने वाल्मीकिले ४६ स्कोर ल्याएको थियो ।
प्रतियोगितामा प्रथम र दोस्रो विद्यालयलाई कार्यक्रमका प्रमुख अतिथि झापा जिल्ला खेलकुद विकास समितिका अध्यक्ष भेषराज भण्डारी प्रशान्तले ट्रफी, मेडल, प्रमाणपत्र प्रदान गर्दै शुभकामना व्यक्त गरेका थिए ।
प्रतियोगितामा झापाका ८ वटा विद्यालयको सहभागिता रहेको थियो । पढाईबाहेक विद्यार्थीलाई खेलकुदप्रति रुचि र जागरुक बनाउनका लागि हरेक वर्ष प्रतियोगिता आयोजना गरिँदै आएको टावर टेम्पल स्कुलका निर्देशक राजीव धिमालले जानकारी दिए ।
कार्यक्रममा मेचीनगर २ का वडा अध्यक्ष दिपक बराल, झापा जिल्ला बास्केटबल संघका अध्यक्ष प्रकाश लिङदेन, नेपाल पत्रकार महासंघ झापा शाखाका अध्यक्ष एकराज गिरी, झापा गोल्डकपका निवर्तमान अध्यक्ष विनोद बस्नेत, जिल्ला ट्राफिक प्रहरी कार्यालय झापाका प्रहरी प्रमुख गणेश पोडेल, बिर्तामोड उद्योग वाणिज्य संघका अध्यक्ष राजु न्यौपाने, उपाध्यक्ष विशाल थापा, बर्दु भ्यालीका सञ्चालक बुद्ध तामाङ, लोत्से इङलिस स्कुलका सञ्चालक धनराज थापा लगायतको आतिथ्यता रहेको थियो ।
विद्यालयका प्रिन्सिपल तेजप्रसाद भटराइको अध्यक्षतामा भएको समापन कार्यक्रमको सञ्चालन शिक्षक यामनाथ घिमिरेले गरेका थिए ।
विद्यालयले यसअघि २८ औँ वार्षिकोत्सव विविध कार्यक्रमका बीच मनाइसकेको छ । कार्यक्रममा विद्यार्थीले माच पास गरेका थिए । साथै, राष्ट्रिय सेवा दल, एनसिसी दलले आकर्षक खुकुरी ड्रिल प्रदर्शनी गरेको थियो ।
त्यस्तै, विद्यालयले आज छात्रातर्फ क्याप्टेन सुविना जवेगु र छात्रतर्फ समिर मुर्मू चयन गरेको छ । सहायक क्याप्टेनतर्फ मनसुन भण्डारी र मिक्सु सुब्बा चयन भएका छन् ।
