बिर्तामोड, माघ २६ । भद्रपुर नगरभित्रका सामुदायिक तथा संस्थागत विद्यालयका विद्यार्थीहरूले एउटै मञ्चमा आफ्नो प्रतिभा प्रदर्शन गर्ने अवसर पाएका छन् ।
भद्रपुर नगरपालिकाको शिक्षा, युवा तथा खेलकुद शाखाले शुक्रबार आयोजना गरेको नगरस्तरीय अन्तरविद्यालय लोकसांस्कृतिक नृत्य प्रतियोगिता तथा विज्ञान सामग्री प्रदर्शन कार्यक्रममा विद्यार्थीहरूले आआफ्नो प्रतिभा प्रदर्शन गर्ने अवसर पाएका हुन् ।
वीरेन्द्र माविमा आयोजना गरिएको कार्यक्रममा ४१ वटा विद्यालयले विज्ञान सामग्री प्रदर्शनीमा र २४ वटा विद्यालयले लोकसांस्कृतिक नृत्य प्रतियोगितामा भाग लिएको शिक्षा शाखाका कर्मचारी योगेन्द्र पौडेलले जानकारी दिए ।
नगर क्षेत्रका ५६ वटा विद्यालयलाई चार भागमा विभाजन गरी त्यहाँ गरिएको नृत्यमा प्रथम र द्वितीय हुने विद्यालयलाई नगरस्तरीय नृत्य प्रतियोगितामा समावेश गराएको पौडेलले बताए ।
नृत्य प्रतियोगितामा प्रावि कक्षातर्फ ज्ञान सरोवर निकेतन मावि प्रथम, होली ल्यान्ड अंग्रेजी मावि दोस्रो, प्रज्ञा एकाडेमी तेस्रो र फुलमुन एकाडेमी सान्त्वना भएका थिए ।
त्यस्तै, आधारभूत कक्षातर्फ ग्रिनफिल्ड इङ्लिस स्कुल प्रथम, विभूति विद्यामन्दिर दोस्रो, होली ल्यान्ड अंग्रेजी विद्यालय तेस्रो र मेची आधारभूत विद्यालय सान्त्वना भएका थिए ।
त्यस्तै, माध्यमिक कक्षातर्फ मोरान मेमोरियल प्रथम, एसएस निकेतन अंग्रेजी मावि दोस्रो, ज्ञानसरोवर निकेतन तेस्रो र वीरेन्द्र मावि सान्त्वना भएका थिए ।
नृत्यतर्फ प्रथम हुने विद्यालयलाई १० हजार, दोस्रोलाई ७ हजार, तेस्रोलाई ५ हजार र सान्त्वनालाई ३ हजार नगदसहित ट्रफी तथा प्रमाणपत्र प्रदान गरिएको थियो ।
उनीहरूलाई कार्यक्रमका अध्यक्ष भद्रपुर नगरपालिकाका प्रमुख गणेश पोखरेल, उपप्रमुख राधा कार्की, प्रमुख प्रशासकीय अधिकृत सुनिल निरौला लगायतले पुरस्कार वितरण गरेका थिए ।
विज्ञान प्रदर्शनीमा जीव विज्ञान, चिकित्सा विज्ञान तथा भौतिक विज्ञानका विभिन्न किसिमका नमुना प्रदर्शन गरिएको थियो ।
प्रदर्शनीमा विद्यार्थीहरूले आफैँले सिर्जना गरेका जलवायु परिवर्तनको असर, सौर्यमण्डल, जीवको जीवनचक्र, उत्तोलकको प्रयोग र उपयोगिता, पानी तथा विद्युतीय माध्यमबाट चलाउन सकिने मेसिनरीहरु, वातावरणमैत्री वस्तुहरू, स्वास्थ्य चिकित्साजस्ता दैनिक जीवनमा उपयोगी विज्ञानका नमुनाहरू प्रदर्शन गरेका थिए ।
विज्ञान सामग्री प्रदर्शनी गरेका विद्यालयहरूमध्ये प्रावि कक्षातर्फ लोट्स इङ्लिस स्कुल प्रथम, हिमालय इङिलस स्कुल दोस्रो, भगवती आधारभूत तेस्रो र नेसनल मेरिगोल्ड सान्त्वना भएका थिए ।
त्यस्तै, आधारभूततर्फ विभूति विद्यामन्दिर प्रथम, सगरमाथा मावि दोस्रो र तेस्रो मोरान मेमोरियल र पृथ्वी आधारभूत सान्त्वना भएका थिए ।
माध्यमिक कक्षातर्फ हिमाली मावि प्रथम, प्रज्ञा एकाडेमी दोस्रो, वीरेन्द्र मावि तेस्रो र अरनिको मावि सान्त्वना भएका थिए ।
विज्ञान सामग्री प्रदर्शनीतर्फ पहिलो हुनेलाई ७ हजार, दोस्रोलाई ५ हजार, तेस्रोलाई ३ हजार र चौथोलाई २ हजार नगदसहित ट्रफी र प्रमाणपत्र प्रदान गरिएको थियो ।
शाखाका कर्मचारी योगेन्द्र पौडेलले सञ्चालन गरेको कार्यक्रममा स्वागत मन्तव्य शाखा प्रमुख पवित्रा ढकालले राखेकी थिइन् ।
