बिर्तामोड, फागुन २ । झापा बारका नवनिर्वाचित पदाधिकारी तथा सदस्यहरूले शुक्रबार पदभार ग्रहण गरेका छन् । झापा बारको कार्यालयमा आयोजित पद हस्तान्तरण कार्यक्रममा निवर्तमान कार्यसमितिले नवनिर्वाचित समितिलाई पद हस्तान्तरण गरेको छ ।
कार्यक्रममा निर्वाचन समितिका संयोजक अधिवक्ता हरि अधिकारी र प्रमुख अतिथिले नवनिर्वाचित पदाधिकारी र सदस्यहरूलाई प्रमाणपत्र प्रदान गरेका थिए ।
पद हस्तान्तरण गर्दै निवर्तमान अध्यक्ष अधिवक्ता नारायण प्रसाद भट्टराईले आफ्नो २ बर्षे कार्यकालमा गरेका महत्वपूर्ण कामका बारेमा जानकारी गराउँदै नयाँ अध्यक्ष अधिवक्ता वसन्त नेपाललाई आफ्नो कार्यकालमा भन्दा अझ उत्कृष्ट काम गर्न शुभकामना दिए ।
कार्यक्रमका प्रमुख अतिथि नेपाल बार एसोसिएसनका उपाध्यक्ष अधिवक्ता सुरज खत्रीले नवनिर्वाचित झापा बार एसोसिएसनले अदालत र बारबीचमा सुमधुर सम्बन्ध कायम राख्न जिम्मेवार ढङ्गले प्रस्तुत हुनुपर्ने सुझाए ।
निर्वाचन समितिका संयोजक हरि प्रसाद अधिकारीको अध्यक्षतामा सम्पन्न पद हस्तान्तरण कार्यक्रममा वरिष्ठ अधिवक्ताहरू दामोदर सापकोटा, कुलप्रसाद दाहाल, टंकप्रसाद उप्रेती, गजेन्द्रप्रसाद आचार्य र अधिवक्ताहरु अशोककुमार पोखरेल, उत्तम पौडेल र टंकप्रसाद दंगालले नयाँ कार्यसमितिलाई शुभकामना व्यक्त गरेका थिए ।
अधिवक्ता कमला आचार्य उप्रेतीले स्वागत गरेको उक्त कार्यक्रमको सञ्चालन निर्वाचन समितिका सदस्य अधिवक्ता विमल संग्रौलाले गरेका थिए ।
झापा बारको अध्यक्ष पदमा वसन्त नेपाल, उपाध्यक्ष चित्रबहादुर मगर, सचिव दिपेन्द्र भट्टराई, सहसचिव सानु कार्की बस्नेत र कोषाध्यक्षमा विजय ढुङ्गाना चयन भएका थिए ।
सदस्यहरुमा रायणप्रसाद पौडेल, हेमकला कट्टेल, शान्ता पाठक, डम्बर गिरी, तारामणि सापकोटा, तारादेवी बाह्रकोटी, नरेश खाती, भूपालमान भट्टराई निर्वाचित भएका थिए ।
केन्द्रीय पार्षदमा नरेन्द्र ढकाल, लक्ष्मीप्रसाद शिवाकोटी, बेनुप्रसाद सिटौला, पवन कार्की, लेखनाथ निरौला, यज्ञप्रसाद अधिकारी, दीर्घसिंह पौडेल निर्वाचित भएका थिए ।
