बिर्तामोड, फागुन ४ । झापाको कनकाई नगरपालिका–८ लक्ष्मीपुरमा विद्युत् पोलमा काम गर्ने क्रममा करेन्ट लागेर एक कर्मचारी घाइते भएका छन् ।
हिजो दिउँसो करिब ३ः३५ बजे भएको घटनामा नेपाल विद्युत् प्राधिकरण लक्ष्मीपुर सवस्टेशनमा कार्यरत स्थानीय ५० वर्षीय पशुपतिनाथ लम्साल घाइते भएका हुन् ।
एसियन हाइवे निर्माणका लागि लक्ष्मीपुर चोकदेखि २०० मिटर पूर्वतर्फ विद्युत् पोलमा ट्रान्सफर्मर सार्ने क्रममा लम्साललाई करेन्ट लागेको हो ।
करेन्ट लागेर गम्भीर घाइते भएका लम्साललाई उपचारका लागि बिर्तामोडस्थित एक अस्पतालमा भर्ना गरिएको इलाका प्रहरी कार्यालय बिर्तामोडका प्रमुख डिएसपी प्रकाश विष्टले जानकारी दिए ।
