बिर्तामोड, फागुन ९ । झापा बिर्तामोड-६ को बुट्टाबारी युनाइटेड क्लबको आयोजनामा फागुन २० गतेदेखि तेस्रो बुट्टाबारी च्यालेन्ज कप २०८१ सुरु हुने भएको छ । फुटबल खेल क्षेत्रको विकास र खेलाडी उत्पादन गर्ने उद्देश्यले प्रतियोगिता आयोजना गरिएको बताइएको छ ।
आयोजक क्लबले आज हरियाली खेल मैदानमा पत्रकार सम्मेलन गरी प्रतयिोगिताको तयारीका बारेमा जानकारी दिएको थियो । प्रतियोगितामा गाईघाट युनाइटेड, विराटनगर सिटी, न्यू स्टार क्लब सुनसरी, रेडहर्ष एफसी इलाम, लेटाङ फुटबल क्लब, र झापाका तीन वटा टिम सहभागी हुने आयोजक क्लबका अध्यक्ष हिमाल कन्दङ्वाले बताए ।
उनका अनुसार झापाको तर्फबाट आयोजकसँगै शनिश्चरे फुटबल क्लब र बगान युथ क्लब कचनकवलले प्रतिस्पर्धा गर्नेछ । प्रतियोगिताको विजेताले २ लाख २ हजार २२२ रुपैयाँ र उपविजेताले एक लाख एक हजार १११ रुपैयाँसहित ट्रफी अध्यक्ष कन्दङ्वाले जानकारी दिए ।
प्रत्येक खेलको प्लेयर अफ दी म्याच बन्ने खेलाडीलाई नगद ३ हजार पुरस्कार दिइनेछ । यस्तै अन्य विधागततर्फ बेष्ट प्लेयरलाई १५ हजार, हाई स्कोररलाई १० हजार, राइजिङ प्लेयरलाई १० हजार र बेष्ट गोलकिपरलाई १० हजार नगद प्रदान गरिने आयोजकले जनाएको छ ।
प्रतियोगिता सम्पन्न गर्न अनुमानित १९ लाख ५० हजार रुपैयाँ खर्च हुने बताइएको छ भने बिर्तामोड नगरपालिका, बिर्तामोड ६ नम्बर वडा कार्यालयसहित विभिन्न संघसंस्था, खेलप्रेमीहरुको सहयोग रहने बताइएको छ । दोस्रो पुरस्कार कनकाई हस्पिटल बिर्तामोडले उपलब्ध गराउने अध्यक्ष कन्दङ्वाले बताए ।
पत्रकार सम्मेलनमा बिर्तामोड-६ का वडाध्यक्ष सूर्यप्रसाद कन्दङ्वाले आगामी वर्ष प्रतियोगिता सम्पन्न गर्नका लागि वडा कार्यालय थप बजेट विनियोजन गर्ने आश्वासन दिएका छन् । कार्यक्रममा झापा जिल्ला फुटबल संघका अध्यक्ष भगीरथ आले (मामा) लगायतले शुभकामना मन्तव्य राखेका थिए ।
क्लबका बरिष्ठ उपाध्यक्ष मरिचमान राईले स्वागत गरेको कार्यक्रमको सञ्चालन सचिव रविन राईले गरेका थिए । कार्यक्रममा वडा सदस्य जीवन बास्कोटा, गीता रेग्मी, क्लवका सल्लाहकार आशिष बनलगायतको आतिथ्य रहेको थियो ।
